Uppáhalds konfektið

Þessi uppskrift af konfekti er svo einföld að það er ekki fyndið.
Eftir að ég fékk þessa uppskrift frá Jónu fyrrum samstarfskonu minni á Mannréttindaskrifstofu sem fékk hana hjá kokkum Maður Lifandi, hef ég gert hana ótal oft þar sem hún er svo fljótleg og rosalega góð. 
Þessir konfektmolar (eiginlega bara súkkulaðikaka samt...) hafa slegið í gegn hjá öllum sem hafa smakkað þá hjá mér. 

Þessi kaka er svona aðeins hollari en gengur og gerist en það er samt varla hægt að tala um hollustu hér miðað við súkkulaðimagnið... :)

Uppskrift:

Uppáhalds súkkulaðikonfektið

frá Maður Lifandi

300g suðusúkkulaði

1 og 1/4 dl kókosmjólk

200g hnetusmjör

125g kasjúhnetur

100g speltkex (t.d. frá Molenaartje, til í Nettó - annars er alveg hægt að nota bara venjulegt hveitikex)

Súkkulaðikrem ofan á: 

250g suðusúkkulaði

1 og 1/4 dl kókosmjólk

Byrjið á því að bræða súkkulaði og kókosmjólk saman á vægum hita. Takið pottinn af hellunni. Bætið hnetusmjörinu því næst við og hrærið vel. Hakkið hnetur og kex í matvinnsluvél og hellið síðan út í pottinn og blandið við súkkulaði/hnetusmjörsblönduna. Hellið í ferhyrnt skúffukökuform (það á að leggja bökunarpappír í formið áður en deiginu er hellt út en ég geri það ekki alltaf, það er þó þægilegra). Setjið inn í ísskáp og kælið í amk. 1 klst. 

Kremið: Bræðið súkkulaði og kókosmjólk saman og hellið yfir deigið. Fínt að setja þetta svo aftur inn í ískáp. Skerið í konfektbita þegar kremið hefur harðnað. 

Þetta er fullkomin kaka til að fara með í saumaklúbb, hafa í veislum osfv því það kemur slatti úr þessari einföldu uppskrift og svo er þetta svona ekta "allra" eftirréttur.

Jarðaberja hráterta

Það er sunnudagur í dag og ég er alltaf í kökustuði á sunnudögum. 

Þessi kaka er ein af mínum uppáhalds, enda holl og góð og hef ég borðað hana í morgun - og hádegismat líka! Ótrúlega saðsöm og stútfull af hollustu (og smá óhollustu..)

Ég fór með þessa í vinkonukveðjuboð í vikunni sem leið og hef verið að fá mér eina og eina litla sneið síðan. Það var bara ekki pláss í litla frystinum mínum fyrir afganginn... ;)

Ég setti þessa uppskrift inn á gömlu síðuna mína sem ég var með úti í Vín en mér fannst ég verða að setja hana aftur. Hún á skilið fallegar myndir, þó ég hefði nú geta gert hana enn fegurri með ferskum jarðaberjum ofan á, það voru bara svo ljót ber til í búðinni..

Jarðaberja hráterta

botn frá Ester og fylling frá Sollu

Botn

1,5 bolli (3,75 dl) kókosmjöl
1,5 bolli möndlur
hálf tsk salt
350 g döðlur
smá agave sýróp

Döðlurnar eru lagðar í bleyti í vatn í um tíu mínútur. Á meðan er kókosmjölið, möndlurnar og saltið sett í matvinnsluvél og unnið vel saman. Að lokum má hella vatninu af döðlunum og bæta döðlunum út í matvinnsluvélina. Því næst skal kreista ögn af agave sýrópi saman við blönduna þar til hún klístrast vel saman. 

Takið venjulegt smelluform og leggið klessuplast ofan í botninn og látið endana á plastinu standa vel upp úr forminu. Takið döðlublönduna úr matvinnsluvélinni og klessið í botninn á forminu með fingrunum. Setjið í frysti á meðan efri lagið er búið til.

Fylling

4 dl kasjúhnetur, lagðar í bleyti í um 2 klst (verða 6 dl) - stundum nenni ég ekki að bíða, það sakar ekki ef þú átt góða matvinnsluvél/blender, þó finnur maður pínu fyrir hnetunum ef maður lætur ekki liggja í um 2 klst
1 -1½ dl agaves sýróp
1 ½ dl kaldpressuð kókosolía
2 tsk vanilluduft
smá himalaya/sjávarsalt
400g frosin jarðaber 

Til að bræða kókosolíuna, látið heitt vatn (ekki yfir 45°C) renna á krukkuna (þetta er til þess að kakan teljist "hrá" - ég svindla samt oft útaf óþolinmæði...). Blandið saman hnetum og agavesýrópi þar til það er orðið silkimjúkt. Bætið þá restinni af upskriftinni út í hentublönduna og blandið mjög vel saman. Setjið fyllinguna yfir botninn og geymið í 1 klst í kæli eða ½ klst í frysti. Tíminn er að vísu persónubundinn, mér finnst best að setja hana aðeins í frysti, taka hana út og leyfa henni að þiðna aftur. Mér finnst tertan best ísköld en samt ekkert frosin, Eyþóri og stelpunum fannst hún betri frosin, þannig að um að gera að prófa bara bæði :) Svo sakar ekki að skreyta með jarðaberjum.

Glútenlausar vanillumúffur með súkkulaðikremi

 

Ég á ennþá smá kókoshnetuhveiti sem ég keypti í Kosti fyrr um árið. Það endist vel ef maður geymir það inni í ísskáp. Ég hef einu sinni áður sett inn uppskrift með kókoshnetuhveiti en hveitið hefur þá eiginleika að draga vel í sig allan vökva og því þarf maður að nota lítið magn af mjöli en mikið magn af t.d. eggjum. Þar sem ég á oftast eggjahvítubrúsa þá verður þetta því voða hollt: lítið hveiti og fullt af eggjahvítum :)

Ég hef aldrei áður gert vanillu cupcakes en mér finnst þær alltaf góðar þegar ég hef smakkað þær. Svo fannst mér þær passa best við súkkulaðimúsina sem ég hafði gert deginum áður, en mig langaði að prófa að nota það sem krem. Það kom mjög vel út, en athugið að þetta er ALLS EKKI neitt líkt djúsí smjörkremi. Mig grunar að þeir sem eru ekki vanir að borða stundum aðeins hollara góðgæti, munu kannski ekki alveg samþykkja þetta sem "krem". En góð var músin þó og held ég að flestir myndu fíla þetta sem súkkulaðimús með berjum og rjóma. Ég fékk svona súkkulaðimús hjá Herdísi vinkonu minni í haust og við settum hana ofan á hafrakex sem var ótrúlega gott!

Vanillumúffur með kókoshnetuhveiti
pínu breytt uppskrift frá Comfy Belly - gerir um 8 stk.

1,25 dl kókoshnetuhveiti (fæst t.d. í ameríska Kosti og í sumum heilsudeildum stórverslanna)
1/4 tsk matarsódi
1/4 tsk salt
8 eggjahvítur (eða 4 egg)
0,8 dl kókosolía (í fljótandi formi)
1 dl hunang/agave sýróp
vanilla í einhverju formi (vanilludropar/sykur) - ég setti örugglega 2 tsk til að fá mikið bragð

Ég blandaði þurrefnunum saman fyrst í matvinnsluvél og svo blautefnunum og blandaði vel (mér finnst gott að nota matvinnsluvélina til þess að slétta út hveitiklumpana). Sett í pappírsform og svo ofan í sílíkonform til þess að fá flottu lögunina. Bakað við 180° í um 20 mín.

Súkkulaðimús/súkkulaðikrem
frá Pure Ebbu

1 hæfilega þroskað avókadó
1 þroskaður banani
4 msk fljótandi kókosolía
3 msk agave sýróp
3 msk kakó
skvetta af vanilludropum & salti

Blanda öllu í matvinnsluvél/blender og voila! 
Reyndar er gott að setja þetta inn í ísskáp í smá tíma til þess að leyfa þessu að stífna aðeins.

Hollt súkkulaðikonfekt

Sorrý með mig, en það er verið að njóta sumarsins stutta sem við höfum á Íslandi. Ég var á fullu í síðustu viku að skipuleggja hina árlegu óvissu-árshátíð fyrir háskólavinkonurnar sem við héldum hátíðlega um helgina. Við skemmtum okkur konunglega á Suðurlandi í stuttbuxnaveðri og ég ætla að stela myndum frá stelpunum ef þær reynast birtingarhæfar..


En annars er hér enn ein uppskriftin af hollum bitum. Þetta er aðeins meira djúsí uppskrift heldur en hinir döðlubitarnir sem ég hef sett hingað inn þar sem í þessari uppskrift er bæði kókosolía og smávegis sýróp. Ég veit ekki hversu margar svona svipaðar uppskriftir ég hef prófað en þessi finnst mér æði, kokosolían gerir mikið fyrir þessa bita en í upprunalegu uppskriftinni (sem ég sá á facebook síðu Heilsuhússins) er þó óþarflega mikið af olíu og of lítið af döðlum þannig að ég breytti uppskriftinni aðeins.


Súkkulaðikonfekt
um 20 döðlur - saxaðar (ég klippi þær með skærum, hverja döðlu í svona 3-4 bita)
4 msk kakó
3-4 msk kókosolía (um að gera að prófa 3 en bæta við ef þetta er ekki nógu blautt - í upprunalegu uppskriftinni voru 6 msk og mér fannst deigið aaaallt of olíukennt)
4 msk hnetusmjör
2 msk sýróp
1 tsk vanilludropar
ögn af salti


Allt mixað saman í matvinnsluvél. Uppskriftin er heldur lítil þannig að ég setti hana bara beint í kassalaga nestisbox og svo inní frysti. Hún þarf að vera þar í amk. 30 mín en eftir að maður tekur bitana úr frystinum tekur þá enga stund að þiðna.

Besta bananabrauðið

Þetta hér er langbesta bananabrauðið sem ég hef smakkað... svo er það líka hollt og ekki stútfullt af sykri eins og mörg bananabrauð eru (sem mér finnst algjör óþarfi því bananarnir gera brauðið svo sætt hvort sem er).
Uppskriftina hef ég gert oft og er hún frá CafeSigrún en vefinn hennar hef ég notast við síðan ég byrjaði að baka oftast í hollari kantinum en það var um mitt árið 2008 minnir mig. 
Fyrir það hafði ég verið í Hússtjórnarskólanum og lært að baka fullt af gamaldags kökum sem innihéldu endalaust af sykri og hveiti. 
Ekki að ég hafi fengið ógeð af því.. þvert á móti leið mér ótrúlega vel í líkamanum önnina sem ég var í Húsó, þó að þar hafi ég alltaf borðað heitan hádegismat og sætt bakkelsi í kaffinu á hverjum einasta degi (afrakstur eldhúshópsins þann morguninn). Mér hefur ekki liðið jafn vel líkamlega og síðan ég var í Húsó þrátt fyrir miklu "hollara" matarræði síðan þá.. já þetta er mér dulin ráðgáta.


Ég bakaði bananabrauðið á sunnudegi til að hafa sem nesti út vikuna. Ég skar það í sneiðar og setti hverja og eina í plast og inní frysti. Setii í örbylgjuofninn í 30 sek og brauðið var sem nýtt.


Besta bananabrauðið
ala CafeSigrún (pínu breytt)


1 egg
90 g hrásykur (ég notaði um 60g og mér fannst ekki vanta sætu)
2 msk agave sýróp (ég notaði hunang, átti ekki agave)
5 þroskaðir bananar
1 msk kókosolía
200 g heilhveiti
2 tsk lyftiduft
1 tsk salt
25 g haframjöl
+ 25 g haframjöl til að strá yfir
+ saxaðar hnetur ef vill


Byrjað er á því að hræra eggið lauslega saman við sykurinn - gott að setja smá og smá útí í einu.
Bananarnir eru maukaðir með gaffli og þeim hrært útí eggjablönduna ásamt olíunni og agave. 
Í stóra skál eru þurrefnunum blandað saman. Hér bætti ég við um 2 msk af söxuðum heslihnetum.
Bananablöndunni er svo hellt útí stóru skálina og varlega blandað saman við þurrefnin, það á að velta þessu rólega.
Klæðið brauðform með bökunarpappír (ég notaði einnota formkökuform sem til eru í matvöruverslunum) og hellið deiginu útí. Stráið haframjölinu yfir.
Hjá Sigrúnu stendur að það eigi að baka brauðið í 40-45 mín. Ég held hins vegar að maður verði að meta það út frá stærð banananna þar sem brauðið mitt var ennþá blautt í miðjunni eftir 45 mín. Ég hafði það því í um 65 inní 180° heitum ofni. Ég mæli með að stinga tannstöngli í miðju brauðsins (þar sem það er þykkast) og ef hann kemur alveg hreinn út, þá er brauðið reddí.


Borðist frekar heitt og með smjöri :)

Hafragrautsmúffur

Hér er önnur uppskrift að morgunmat "on the go" eða fínasta millimál. 

Þetta er í raun bara hafragrautur í möffinsformi :)

Mjög sniðugt og hrikalega gott ef maður setur eitthvað smá útí eins og ber og hnetur.

Mörgum gætu þótt þessar þurrar en það er sennilega af því að maður býst við að þetta séu "eftirréttar" möffins en í raun er þetta bara hollur hafragrautur og því ekki mjög djúsí. Enda alveg sykurlaust og rosa hollt!

Ég bjó til mína eigin uppskrift, ég hef notast við nokkrar mismunandi og þetta er blanda af þeim.

Hafragrautsmúffur með hind&bláberjum og heslihnetum

2 þroskaðir bananar (eða 2-3 krukkur af eplamauki/barnamat - ég nota alltaf bara það sem lítur út fyrir að vera um 2 bananar, fer eftir stærð krukkunnar)

2 eggjahvítur (eða 1 egg)

1 tsk vanilludropar

(hér má setja smá sætuefni ef maður vill eins og 1 tsk af agavesýrópi/hunangi)

5 dl haframjöl eða tröllahafrar

1 msk kanill

1 tsk lyftiduft

1 og 3/4 - 2 dlmjólk að eigin vali (kúamjólk/rísmjólk/soja...) 

(ég notaði 2 dl, einn dl léttmjólk + einn dl AB mjólk)

Í þetta skiptið setti ég slatta af frosnum hindberjum og bláberjum og setti hakkaðar heslihnetur ofan á hverja og eina. Næst ætla ég þó að setja bara hneturnar beint í deigið þar sem þær voru svolítið að detta af..

Blautefnin eru hrærð saman (bananarnir eru stappaðir fyrst ef þeir eru notaðir) - síðan þurrefnin útí. Mjólin er sett síðust, best að byrja að setja 1 og hálfan dl og fikra sig svo áfram, þetta á að vera nokkuð blautt. Þetta er sett í sílikonmöffinsform (þar sem það er engin olía/ekkert smjör þá er ekki hægt að notast við pappaform)

Bakað í um 25-30 mín við 180°. 

Ég mæli með að leyfa múffunum að kólna alveg og setja svo í plastpoka og inní frysti. Þær geymast kannski í nokkra daga inní kæli en þær eru alveg jafn góðar ef maður frystir þær bara strax og setur svo í 30 sek í örbylgjuofninn. 

...Það er líka ótrúlega gott að setja smá slettu af grískri jógúrt ofan á þær :)

Súkkulaðibita blondínur

Blondies eru svipaðar og brownies nema ekki með súkkulaðigrunni en ég setti þó súkkulaðibita í þessar blondínur. Þær eru vel í hollari kantinum - ekkert smjör, ekkert hveiti og ekki það mikill sykur. Þær eru með hnetusmjöri sem gerir virkilega góðan keim og svo setti ég valhnetur útí líka.

En aðalinnihaldsefnið er..... kjúklingabaunir!

Já, það er hægt að gera mjög gómsætar kökur úr baunum. 

Mæli með að þið prófið þar sem flestir sem hafa smakkað þessar hafa verið mjög ánægðir, sérstaklega samstarfskonur mínar sem hafa ekkert á móti því að ég komi með hollustugóðgæti af og til í vinnuna :)

Súkkulaðibita blondínur

uppskrift frá Chocolate Covered Katie

1 dós kjúklingabaunir

3/4 tsk lyftiduft 

1/8 tsk matarsódi

1/4 tsk salt

1 dl sykur (á að vera 1 og 3/4dl - það má alveg ef þið viljið ekki minnka sykurmagnið)

2 tsk vanilludropar

0,6 dl hnetusmjör

0,6 dl hafrar

slatti af súkkulaðibitum/söxuðu suðusúkkulaði (ég setti um 1,5 dl)

1/2 dl saxaðar valhnetur (ekki í of litla bita samt)

 

Byrjið á því að hreinsa kjúklingabaunirnar vel (gott að setja í sigti og láta renna vel af vatni á þær). 

Því næst setjið allt nema súkkulaðið í matvinnsluvél og blandið þangað til nokkuð mjúkt og slétt.

Setjið súkkulaðibitana útí og hrærið með sleif.

Ég setti deigið síðan í ofnotaða sílíkonmöffinsformið mitt og fékk 11 blondínur útúr því.

Það er líka hægt að setja í kassalaga form en deigið er t.d. of lítið fyrir skúffukökuformið sem ég á - flestar uppskriftirnar hennar Katie eru frekar litlar þannig að ég myndi passa að hafa formið í minna lagi svo að kökurnar verði ekki þunnar. Held þær séu bestar þykkar og djúsí..

Bakið við 180° í um 30 mín.

Eggjahvítumúffur

Eggjahvítumúffur eru algjör snilld - eiginlega ommiletta "on the go"

Ég er farin að gera eggjahvítumúffur ansi oft þar sem Eyþóri finnst gott að grípa með sér morgunmat en ég borða þær eiginlega alltaf sem millimál, mér finnst mjög fínt að fá mér svona 2 plús ávöxt seinnipart dags þegar ég er svöng. Þær eru fljótgerðar, rosalega hollar og sniðugar fyrir þá sem nenna ekki að elda sér ommilettu alltaf þegar á að nota eggjahvíturnar. Ég nota oftast uppskriftina sem ég fann í fyrra á Heilsupressunni hjá Svövu Rán (sem ég finn ekki akkúrat núna og nenni ekki að leita - ég seivaði hana í tölvuna fyrir löngu). Það er fínasta grunnuppskrift, fáránlega auðveld og tekur enga stund að hræra í þetta.

Eggjahvítumúffur
8 eggjahvítur
200 g kotasæla
1 msk kókoshnetuhveiti eða 2 msk annað hveiti (ég nota kókos af því að ég á það og að það þarf minna af því en þær verða örugglega alveg eins með venjulegu hveiti/spelt)
1 tsk lyftiduft
hvaða krydd sem er


Þessu er öllu hrært saman í skál og ATHUGIÐ að "deigið" er rosalega þunnt! Maður trúir varla að þetta eigi að vera svona en hafið engar áhyggjur :)


Múffurnar eru svo bakaðar í ofni við 180-200° (hversu dökkar þið viljið hafa þær) í amk. 30 mín en ég hef þær bara þangað til þær eru orðnar vel dökkar, það tekur oftast aðeins lengri tíma en hálftíma.

Ég nota alltaf sílíkon möffinsform, það er örugglega erfitt að nota pappaform, mig grunar að deigið myndi leka útum allt...


Svona er hægt að hafa þær einfaldar en ég set alltaf eitthvað gums í.


Síðast gerði ég 2x uppskrift, í annan skammtinn setti ég:
- Skinku
- Mexíkó-ost
-Paprikukrydd
-Oreganó
- Salt&pipar


Í hinn skammtinn setti ég:
- Tómata
- Parmesan ost (í deigið og líka ofan á í lokin)
- Basil


Þær geymast ótrúlega lengi í nestisboxi inní ísskáp, ég set þær svo örskamma stund í örbylgjuna en það er óþarfi, þær eru fínar líka kaldar. 
(Veit ekki hvort þær haldist góðar ef þær eru frystar - ég hef aldrei þurft þess því við klárum þær eiginlega alltaf á rúmri viku)

Súkkulaði-döðlustykki

Hæ!

Þá er ég komin heim frá Brussel, var á ótrúlega skemmtilegri ráðstefnu með virkilega skemmtilegum hópi. 

Hef ekki enn lódað inn myndum í tölvuna þar sem ég er búin að vera á fullu síðan ég kom heim (úrslitatörnering í körfunni hjá litla bróður og úrslitakeppnin hjá körlunum - sem er orðin mjög spennandi).

Á meðan myndir frá Brussel og New York bíða betri tíma þá getiði útbúið handa ykkur smá millimálsbita sem er ótrúlega góður og "aðeins hollari" en flestir slíkir.

Súkkulaði-döðlustykki

350 g döðlur

2,5 dl möndlur

3-4 msk kakó

2-3 msk kókosmjöl

1 tsk vanilludropar

smá salt

Best er að byrja á því að saxa niður döðlurnar og möndlurnar aðeins líka. Síðan er öllu skellt í matvinnsluvél og unnið þangað til þetta er orðið klístrað saman. Ég set þetta alltaf beint í ferhyrnt form (má setja bökunarpappír/plast fyrst) og svo inn í kæli í um 2 klst.

Síðan er þetta skorið niður í stykki og þetta geymist ótrúlega vel í nestisboxi inni í ískáp.

Lemon/PoppySeed Muffins

Í Ameríku kynntist ég samsetningunni lemon+poppy seed. Þá var ég reyndar ekki orðin nógu (matar)þroskuð til þess að kunna meta svona bakkelsi en núna er ég aldeilis hrifin. Þetta eru semsagt sítrónumúffur með birkifræjum (valmúafræjum). Þær eru glútenlausar þar sem ég notaði kókoshnetuhveiti sem er ansi gott! Það keypti ég í Kosti í Kópavogi en þar er mikið úrval af glútenlausu mjöli.

Glútenlausar sítrónumúffur með birkifræjum

Uppskrift frá Comfy Belly

1,25 dl kókoshveiti (coconut flour)

1/2 tsk salt

1/4 tsk matarsódi

4 egg

0,8 dl kókosolía

1 dl hunang

1 msk vanilludropar

1 msk birki/valmúafræ

1 msk rifinn sítrónubörkur (u.þ.b. af einni sítrónu)

Blandið saman þurrefnum í matvinnsluvélaskál með gaffli/sleif. Setjið egg og hunang út í og setjið vélina (má líka vera hrærivél) í gang, blandið vel. Næst fer vanilla og fræ út í og svo ríf ég börkinn beint út í skálina. Mixið aftur..

Setjið í form og inn í ofn.

Bakið við 180°í um 12 mín (þangað til tannstöngull kemur hreinn út ef maður stingur honum í kökurnar)

Kókoshnetuhveiti er rosalega gott á bragðið en frekar sérstök áferðin. Mæli með að þið prófið! Það eru helling af uppskriftum til á veraldarvefnum með kókoshnetuhveiti. Það góða við það er að maður þarf svo lítið af mjöli en hins vegar fleiri egg (sem eru holl, ég elska egg!).

Kremið sem ég gerði er bara úr kókosmjólk og kreistri sítrónu! Ótrúlega einfalt og ferskt. 

Segi ykkur seinna frá leyndarmálinu hvernig hægt er að gera krem úr kókosmjólk og meirasegja þykkt (ég hefði geta gert það þykkara en þetta). Gerði súkkulaðimús úr kókosmjólk um daginn sem var rosa góð, set uppskrift inn bráðum :)

Döðlu - og sítrónustykki

Þessi stykki eru ekta hollur millimálsbiti. Þau svipa til LÄRABAR ef þið kannist við þau.

Ég hef tekið 2-3 stykki með mér í vinnuna undanfarið og þetta er ótrúlega gott og saðsamt! 

Ég er með smá æði fyrir sítrónum þessa stundina og það er mjög góður sítrónukeimur af þessum 

(ég missti mig að vísu pínu og setti soldið mikið af sítrónu sem var heldur mikið fyrir suma á þessu heimili, en það var þá bara meira fyrir mig ;)

Ég ætla að prófa mig áfram og prófa alls konar útgáfur af svona hollustu millimálsstykkjum því þetta er snilld fyrir kex-brjálæðinginn mig (kemur samt ekki beint í staðinn...) sem verður að fá sér eitthvað gott á milli mála.

Döðlu - og sítrónustykki

Uppskrift frá Shutterbean

450g saxaðar döðlur

2,5 dl möndlur

1,25 dl kasjúhnetur

1 msk sítrónubörkur/af einni sítrónu (passa hér að rífa ekki alveg inn að hvíta berkinum, hann er beiskur)

2 msk kreistur sítrónusafi

1 tsk sítrónudropar (má sleppa)

Ég mæli með því að saxa döðlurnar og jafnvel leggja aðeins í bleyti því þetta ferli var mjög erfitt fyrir matvinnsluvélina mína af því að döðlurnar voru ekki mjög mjúkar og ég var ekkert búin að skera þær niður. Þið metið það bara út frá ykkar matvinnsluvél og hversu mjúkar döðlurnar eru. 

Setjið döðlurnar, möndlur, kasjúhnetur og rifinn sítrónubörk í matvinnsluvél og blandið mjög vel saman.

Hellið svo vökvanum út í (ég myndi prófa mig áfram hér hversu mikinn sítrónusafa þið viljið og sítrónudropa ef þið eigið þá, prófa fyrst 1 msk og sjá hvort þið viljið enn meira sítrónubragð).

Vinnið vel þangað til vel klístrað.

Setjið beint í kassalaga form eða setjið bökunarpappír/plast fyrst (ég gerði það ekki en það er af því að mér er sama um þetta form og sker alltaf bara beint í það)

Kælið inni í ískáp í svona 2-3 klst. Skerið svo í bita af þeirri stærð sem þið viljið.

Gott er að geyma í nestisboxum inni í ískáp, þetta geymist nokkuð lengi þannig.

Strawberry cupcakes

Jarðaberja cupcakes
 (uppskrift innblásin af möffins uppskriftum Lísu Hjalt)
 
3,75 dl spelt
40 g haframjöl
2 tsk lyftiduft
½ tsk fínt sjávarsalt
1 tsk vanilla
1 egg
1 dl hrásykur
½ matskeið sítrónusafi
1 matskeið kókosolía
3 bananar (eða barnamatur með epla og/eða bananabragði að sama magni og um 3 bananar, myndi segja 3 litlar glerkrukkur)
1, 5-2 dl frosin jarðaber (smekksatriði)
25 g möndlur, saxaðar


Takið jarðaber út úr frystinum. Blandið þurrefnunum saman í stóra skál og setjið til hliðar. Í aðra og minni skál, hrærið saman eggi, hrásykri, sítrónusafa og brædda kókosolíu (setjið annað hvort krukkuna inn í örbylgjuofn eða undir heitt vatn). 
Stappið bananana og blandið út í eggjablönduna (eða setjið barnamatinn út í). Saxið möndlurnar mjög smátt (eða setjið í matvinnsluvél) og setjið út í þurrefnaskálina.Notið sleikju til þess að blanda blautefnunum rólega saman við þurrefnin og alls ekki hræra mikið. Deigið á að vera létt í sér þannig að þið þurfið bara rétt að velta deiginu með sleikjunni þar til hráefnin hafa blandast saman. Saxið jarðaberin sem eru enn ágætlega frosin,  í munnbita og blandið þeim rólega saman við deigið.
Hellið deiginu í sílíkonform (það er erfitt að nota pappírsform fyrir þessar þar sem það er svo lítið af fitu/olíu í uppskriftinni - ég setti í sílikonform rétt upp að helming og setti þær svo í pappírsformin eftir að kökurnar komu úr ofninum bara af því að mér finnst betra að hafa þær í pappírsformum, sérstaklega þegar maður setur krem ofan á).
Bakið við 180° í um 25 mín.
Látið kólna og smyrjið vanillukremi ofan á (í þessar notaði ég tilbúið krem en ég kem bráðum með uppskrift af hollum kremum úr kókosmjólk!).
Skreytið með jarðaberi ef þið viljið, það er svo fallegt :)

Hveitilausar súkkulaðibitasmákökur

Ég skal viðurkenna að þetta eru ekki fallegustu smákökur sem ég maður hefur séð.. né þær bestu.

Eeen fyrir þá sem eru að reyna að forðast hveiti og mikinn sykur þá eru þetta fínustu smákökur. Eiginlega bara mjög fínar, sérstaklega í millimál. Þær eru akkurat eins og ég vil hafa smákökur, ekki of harðar og ekki of mjúkar. Ég ímynda mér að hægt sé að gera þær enn betri með að setja jafnvel saxaðar möndlur eða hnetur.. Uppskriftin er ótrúlega einföld og allt ferlið tekur svona 20 mín! Og bökunartíminn er meirasegja innifalinn. 

En það er eitt.. þið verðið að eiga matvinnsluvél/mixer eða eitthvað slíkt til að gera þessar.

Hveitilausar súkkulaðibitasmákökur

(uppskrift fengin hjá Chocholate Covered Katie)

3,75 dl hafrar

1/2 tsk matarsódi

dass af salti

4 msk púðursykur

2-3 msk brætt smjör (örugglega hægt að skipta út fyrir olíu/kókosolíu)

4 msk mjólk (eða soya/rísmjólk)

slatti af súkkulaðibitum

Setjið fyrstu 4 hráefnin í matvinnsluvél og blandið vel. Bætið síðan smjörinu og mjólkinni út í með sleikju og skellið síðan ágætri gommu af súkkulaðibitum útí.

Bakið í um 10-12 mín við 180°.