Kúrbítsbrauð

Ég mundi rétt í þessu þegar ég er með kúrbítsbrauðið í ofninum að ég ætlaði að setja uppskriftina hingað inn. Ég hreinlega verð þar sem ég elska þetta brauð! Ég gerði það í janúar og án gríns, ég fékk mér 1-2 sneiðar á hverjum morgni í svona viku.. (sem er ólíkt mér þar sem ég fæ mér yfirleitt ekki það sama hvern einasta dag, oftast er það hafragrautur, búst, flatkökur, soðin egg, morgunkorn eða einhver blanda af þessu). Það er mjög þægilegt að skella þessu í sig þegar maður er á hraðferð á morgnana og ekki skemmir fyrir hvað brauðið er saðsamt. Einnig geymist það mjög vel sökum mikils vatnsmagns í kúrbítnum en ég geymdi það inni í ískáp síðast og það var mjög fínt. 

Brauðið er frekar blautt í sér en þannig finnst mér svona "sætari" brauð vera best. Sama finnst mér um bananabrauð, ég fíla engan vegin þurr brauð en uppáhalds bananabrauðsuppskriftina mína má finna hér.

Kúrbítsbrauð

uppskrift úr bókinni Hollt nesti heiman að

65g pekahnhetur/valhnetur saxaðar gróft

185 dl olía

1 tsk vanilludropar

1 dl hunang

3 egg

140g gróft spelt

140g fínt spelt (ég átti bara heilhveiti og notaði því 280g af því)

1/2 tsk matarsódi

1 og 1/2 tsk lyftiduft

1/2-1 tsk kanill (ég set að sjálfsögðu alltaf meira en stendur :)

350g kúrbítur rifinn

2 og 1/2 tsk sítrónubörkur

dass af salti

Léttristið hneturnar á pönnu. Hrærið olíu, hunangi og vanillu vel saman (ég notaði handpísk) og bætið við eggjum, einu og einu í einu þangað til blandan verður létt og ljós. Blandið saman þurrefnum í annarri skál og hellið svo yfir í blautefnaskálina. Rífið kúrbítinn niður í strimla með rifjárni og blandið saman við með sleif ásamt örlitlu salti, sítrónuberki og söxuðum hnetum. Veltið þangað til allt hefur blandast vel saman.

Hellið í brauðform (ef þið eigið ekki sílíkonform myndi ég mæla með að setja smjörpappír í formið áður) og bakið í um eina klst. við 180°. Ég sting alltaf tannstöngli í miðjuna til þess að athuga hvort deigið festist við, þið munið að ofnar eru mismunandi...

Uppáhalds konfektið

Þessi uppskrift af konfekti er svo einföld að það er ekki fyndið.
Eftir að ég fékk þessa uppskrift frá Jónu fyrrum samstarfskonu minni á Mannréttindaskrifstofu sem fékk hana hjá kokkum Maður Lifandi, hef ég gert hana ótal oft þar sem hún er svo fljótleg og rosalega góð. 
Þessir konfektmolar (eiginlega bara súkkulaðikaka samt...) hafa slegið í gegn hjá öllum sem hafa smakkað þá hjá mér. 

Þessi kaka er svona aðeins hollari en gengur og gerist en það er samt varla hægt að tala um hollustu hér miðað við súkkulaðimagnið... :)

Uppskrift:

Uppáhalds súkkulaðikonfektið

frá Maður Lifandi

300g suðusúkkulaði

1 og 1/4 dl kókosmjólk

200g hnetusmjör

125g kasjúhnetur

100g speltkex (t.d. frá Molenaartje, til í Nettó - annars er alveg hægt að nota bara venjulegt hveitikex)

Súkkulaðikrem ofan á: 

250g suðusúkkulaði

1 og 1/4 dl kókosmjólk

Byrjið á því að bræða súkkulaði og kókosmjólk saman á vægum hita. Takið pottinn af hellunni. Bætið hnetusmjörinu því næst við og hrærið vel. Hakkið hnetur og kex í matvinnsluvél og hellið síðan út í pottinn og blandið við súkkulaði/hnetusmjörsblönduna. Hellið í ferhyrnt skúffukökuform (það á að leggja bökunarpappír í formið áður en deiginu er hellt út en ég geri það ekki alltaf, það er þó þægilegra). Setjið inn í ísskáp og kælið í amk. 1 klst. 

Kremið: Bræðið súkkulaði og kókosmjólk saman og hellið yfir deigið. Fínt að setja þetta svo aftur inn í ískáp. Skerið í konfektbita þegar kremið hefur harðnað. 

Þetta er fullkomin kaka til að fara með í saumaklúbb, hafa í veislum osfv því það kemur slatti úr þessari einföldu uppskrift og svo er þetta svona ekta "allra" eftirréttur.

Kúrbítsklattar

Ég er að spá í að byrja aftur að deila uppskriftum eins og ég gerði áður en flutti til Englands. Þar bjó ég í stúdentaíbúð með mjög takmörkuðum eldhúsáhöldum sem gerði það að verkum að áhugi minn til þess að stússast í eldhúsinu var sama sem enginn. Það eina sem ég eldaði voru grænmetispottréttir, fahitas og pastaréttir. Við átum því miður frekar mikið af tilbúnum réttum eins og súpu, asískum frosna rétti úr Iceland á tvö pund (hversu sorglegt.. haha, þetta var samt alveg alltílagi). Ég reyni sem mest að borða mat sem ég geri sjálf frá grunni en stundum hreinlega nennir maður ekki að standa í því. Úti var ég eiginlega alltaf lærandi og þegar ég tók mér pásur þá fórum við frekar út á kaffihús, í göngutúra osfv þar sem ég hafði ekki löngun til þess að hanga í þessu litla eldhúsi þar sem ég átti einn pott og eiginlega ekkert annað.

Núna hinsvegar hefur allt róast þar sem ég er í tveggja mánaða pásu og er á Íslandi með fullt af eldhústækjum og bý með fólki sem vill helst bara hollan mat. Ég er því ansi glöð með að hafa svona mikinn tíma til þess að geta dundað mér í eldhúsinu með tengdamömmu :) 

Ég setti inn mynd á instagram af útkomunni af kúrbítsæði mínu en í vikunni gerði ég tvær uppskriftir úr bók sem ég náði mér í á bókasafninu sem heitir Hollt nesti heiman að. Alltaf þegar ég er nýbúin í lokaprófum/lokaritgerðum þá fer ég alltaf beint á bókasafnið til að taka bækur til að lesa fyrir mig sjálfa (svo ánægð að þurfa ekki að lesa fyrir skólann) og svo næ ég mér oftast í matreiðslubækur og/eða nokkur eintök af gömlum Gestgjöfum. 

Allavega, þá voru nokkrar vinkonur sem vildu fá uppskriftina af kúrbítsklöttum sem ég gerði í vikunni. Ég ætlaði nú ekkert að deila þessari uppskrift og tók bara eina símamynd af matardisknum mínum en svo vorum við öll svo ánægð með klattana að ég mæli hiklaust með þeim.

Kúrbítsklattar
úr bókinni Hollt nesti heiman að

1 kúrbítur 
2 skallottulaukar
5-6 msk heilhveiti/spelt
1 egg
50-60gr rifinn ostur
1-2 msk smátt söxuð steinselja (átti þetta ekki til og notaði bara ýmis krydd sem ég átti, mæli með Kryddi lífsins m.a.)
salt&pipar

Rífið kúrbítinn með grófu rifjárni (ég notaði samskonar rifjárn og ég nota þegar ég ríf niður ost) og setjið í sigti yfir skál ásamt 2 tsk af salti til að draga úr honum vökvann. Leyfið þessu að liggja í a.m.k. 2-3 klst. Kreistið því næst eins mikið af vökvanum og hægt er úr kúrbítnum. Blandið egginu, ostinum og kryddinu saman í skál. Bætið kúrbítnum útí og loks speltinu. Það gæti þurft aðeins meira eða minna af spelti, fer eftir því hversu mikill vökvi er eftir í kúrbítnum. Hitið olíu á pönnu og setjið deigið á með skeið. Úr uppskriftinni fáið þið um 8-10 klatta. 

Við vorum með ofnsteikt grænmeti með og kaldar sósur en í bókinni er mælt með tzatziki sósu (að sjálfsögðu var fengið sér 2x á diskinn.. :)

Karamellukaka með rice crispies og banana

Þessi kaka er syndsamlega góð enda ansi mikið af gúmmelaði í henni. Upphaflega eru þetta karamellu rice crispies stykki en ég vildi gera meiri köku úr þessu. Ég skar niður tvo banana og setti ofan á og svo þeyttan rjóma. Útkoman var heldur betur góð. Bananinn bráðnar hálfpartinn og passar mjög vel við karamelluna.

Karamellukaka með rice crispies og banana

100 g rjómasúkkulaði
100 g karamellusúkkulaði (t.d Galaxy Caramel, Rolo eða Nóa Síríus karamellu Pipp)
4 msk sýróp
100 g smjör 
(ég minnkaði aðeins magnið og setti um 2-3 msk af sýrópi og 50g smjör)
- Þetta er allt brætt saman í potti á vægum hita.

Síðan er potturinn tekinn af hellunni og slatta af rice crispies skellt útí. Blanda vel saman og setja helst inn í frysti.

Rétt áður en kakan er borin fram er gott að skera niður tvo (og hálfan) banana og setja ofan á og síðan þeyttan rjóma.

Jarðaberja hráterta

Það er sunnudagur í dag og ég er alltaf í kökustuði á sunnudögum. 

Þessi kaka er ein af mínum uppáhalds, enda holl og góð og hef ég borðað hana í morgun - og hádegismat líka! Ótrúlega saðsöm og stútfull af hollustu (og smá óhollustu..)

Ég fór með þessa í vinkonukveðjuboð í vikunni sem leið og hef verið að fá mér eina og eina litla sneið síðan. Það var bara ekki pláss í litla frystinum mínum fyrir afganginn... ;)

Ég setti þessa uppskrift inn á gömlu síðuna mína sem ég var með úti í Vín en mér fannst ég verða að setja hana aftur. Hún á skilið fallegar myndir, þó ég hefði nú geta gert hana enn fegurri með ferskum jarðaberjum ofan á, það voru bara svo ljót ber til í búðinni..

Jarðaberja hráterta

botn frá Ester og fylling frá Sollu

Botn

1,5 bolli (3,75 dl) kókosmjöl
1,5 bolli möndlur
hálf tsk salt
350 g döðlur
smá agave sýróp

Döðlurnar eru lagðar í bleyti í vatn í um tíu mínútur. Á meðan er kókosmjölið, möndlurnar og saltið sett í matvinnsluvél og unnið vel saman. Að lokum má hella vatninu af döðlunum og bæta döðlunum út í matvinnsluvélina. Því næst skal kreista ögn af agave sýrópi saman við blönduna þar til hún klístrast vel saman. 

Takið venjulegt smelluform og leggið klessuplast ofan í botninn og látið endana á plastinu standa vel upp úr forminu. Takið döðlublönduna úr matvinnsluvélinni og klessið í botninn á forminu með fingrunum. Setjið í frysti á meðan efri lagið er búið til.

Fylling

4 dl kasjúhnetur, lagðar í bleyti í um 2 klst (verða 6 dl) - stundum nenni ég ekki að bíða, það sakar ekki ef þú átt góða matvinnsluvél/blender, þó finnur maður pínu fyrir hnetunum ef maður lætur ekki liggja í um 2 klst
1 -1½ dl agaves sýróp
1 ½ dl kaldpressuð kókosolía
2 tsk vanilluduft
smá himalaya/sjávarsalt
400g frosin jarðaber 

Til að bræða kókosolíuna, látið heitt vatn (ekki yfir 45°C) renna á krukkuna (þetta er til þess að kakan teljist "hrá" - ég svindla samt oft útaf óþolinmæði...). Blandið saman hnetum og agavesýrópi þar til það er orðið silkimjúkt. Bætið þá restinni af upskriftinni út í hentublönduna og blandið mjög vel saman. Setjið fyllinguna yfir botninn og geymið í 1 klst í kæli eða ½ klst í frysti. Tíminn er að vísu persónubundinn, mér finnst best að setja hana aðeins í frysti, taka hana út og leyfa henni að þiðna aftur. Mér finnst tertan best ísköld en samt ekkert frosin, Eyþóri og stelpunum fannst hún betri frosin, þannig að um að gera að prófa bara bæði :) Svo sakar ekki að skreyta með jarðaberjum.

Glútenlausar vanillumúffur með súkkulaðikremi

 

Ég á ennþá smá kókoshnetuhveiti sem ég keypti í Kosti fyrr um árið. Það endist vel ef maður geymir það inni í ísskáp. Ég hef einu sinni áður sett inn uppskrift með kókoshnetuhveiti en hveitið hefur þá eiginleika að draga vel í sig allan vökva og því þarf maður að nota lítið magn af mjöli en mikið magn af t.d. eggjum. Þar sem ég á oftast eggjahvítubrúsa þá verður þetta því voða hollt: lítið hveiti og fullt af eggjahvítum :)

Ég hef aldrei áður gert vanillu cupcakes en mér finnst þær alltaf góðar þegar ég hef smakkað þær. Svo fannst mér þær passa best við súkkulaðimúsina sem ég hafði gert deginum áður, en mig langaði að prófa að nota það sem krem. Það kom mjög vel út, en athugið að þetta er ALLS EKKI neitt líkt djúsí smjörkremi. Mig grunar að þeir sem eru ekki vanir að borða stundum aðeins hollara góðgæti, munu kannski ekki alveg samþykkja þetta sem "krem". En góð var músin þó og held ég að flestir myndu fíla þetta sem súkkulaðimús með berjum og rjóma. Ég fékk svona súkkulaðimús hjá Herdísi vinkonu minni í haust og við settum hana ofan á hafrakex sem var ótrúlega gott!

Vanillumúffur með kókoshnetuhveiti
pínu breytt uppskrift frá Comfy Belly - gerir um 8 stk.

1,25 dl kókoshnetuhveiti (fæst t.d. í ameríska Kosti og í sumum heilsudeildum stórverslanna)
1/4 tsk matarsódi
1/4 tsk salt
8 eggjahvítur (eða 4 egg)
0,8 dl kókosolía (í fljótandi formi)
1 dl hunang/agave sýróp
vanilla í einhverju formi (vanilludropar/sykur) - ég setti örugglega 2 tsk til að fá mikið bragð

Ég blandaði þurrefnunum saman fyrst í matvinnsluvél og svo blautefnunum og blandaði vel (mér finnst gott að nota matvinnsluvélina til þess að slétta út hveitiklumpana). Sett í pappírsform og svo ofan í sílíkonform til þess að fá flottu lögunina. Bakað við 180° í um 20 mín.

Súkkulaðimús/súkkulaðikrem
frá Pure Ebbu

1 hæfilega þroskað avókadó
1 þroskaður banani
4 msk fljótandi kókosolía
3 msk agave sýróp
3 msk kakó
skvetta af vanilludropum & salti

Blanda öllu í matvinnsluvél/blender og voila! 
Reyndar er gott að setja þetta inn í ísskáp í smá tíma til þess að leyfa þessu að stífna aðeins.

Hollt súkkulaðikonfekt

Sorrý með mig, en það er verið að njóta sumarsins stutta sem við höfum á Íslandi. Ég var á fullu í síðustu viku að skipuleggja hina árlegu óvissu-árshátíð fyrir háskólavinkonurnar sem við héldum hátíðlega um helgina. Við skemmtum okkur konunglega á Suðurlandi í stuttbuxnaveðri og ég ætla að stela myndum frá stelpunum ef þær reynast birtingarhæfar..


En annars er hér enn ein uppskriftin af hollum bitum. Þetta er aðeins meira djúsí uppskrift heldur en hinir döðlubitarnir sem ég hef sett hingað inn þar sem í þessari uppskrift er bæði kókosolía og smávegis sýróp. Ég veit ekki hversu margar svona svipaðar uppskriftir ég hef prófað en þessi finnst mér æði, kokosolían gerir mikið fyrir þessa bita en í upprunalegu uppskriftinni (sem ég sá á facebook síðu Heilsuhússins) er þó óþarflega mikið af olíu og of lítið af döðlum þannig að ég breytti uppskriftinni aðeins.


Súkkulaðikonfekt
um 20 döðlur - saxaðar (ég klippi þær með skærum, hverja döðlu í svona 3-4 bita)
4 msk kakó
3-4 msk kókosolía (um að gera að prófa 3 en bæta við ef þetta er ekki nógu blautt - í upprunalegu uppskriftinni voru 6 msk og mér fannst deigið aaaallt of olíukennt)
4 msk hnetusmjör
2 msk sýróp
1 tsk vanilludropar
ögn af salti


Allt mixað saman í matvinnsluvél. Uppskriftin er heldur lítil þannig að ég setti hana bara beint í kassalaga nestisbox og svo inní frysti. Hún þarf að vera þar í amk. 30 mín en eftir að maður tekur bitana úr frystinum tekur þá enga stund að þiðna.

Besta bananabrauðið

Þetta hér er langbesta bananabrauðið sem ég hef smakkað... svo er það líka hollt og ekki stútfullt af sykri eins og mörg bananabrauð eru (sem mér finnst algjör óþarfi því bananarnir gera brauðið svo sætt hvort sem er).
Uppskriftina hef ég gert oft og er hún frá CafeSigrún en vefinn hennar hef ég notast við síðan ég byrjaði að baka oftast í hollari kantinum en það var um mitt árið 2008 minnir mig. 
Fyrir það hafði ég verið í Hússtjórnarskólanum og lært að baka fullt af gamaldags kökum sem innihéldu endalaust af sykri og hveiti. 
Ekki að ég hafi fengið ógeð af því.. þvert á móti leið mér ótrúlega vel í líkamanum önnina sem ég var í Húsó, þó að þar hafi ég alltaf borðað heitan hádegismat og sætt bakkelsi í kaffinu á hverjum einasta degi (afrakstur eldhúshópsins þann morguninn). Mér hefur ekki liðið jafn vel líkamlega og síðan ég var í Húsó þrátt fyrir miklu "hollara" matarræði síðan þá.. já þetta er mér dulin ráðgáta.


Ég bakaði bananabrauðið á sunnudegi til að hafa sem nesti út vikuna. Ég skar það í sneiðar og setti hverja og eina í plast og inní frysti. Setii í örbylgjuofninn í 30 sek og brauðið var sem nýtt.


Besta bananabrauðið
ala CafeSigrún (pínu breytt)


1 egg
90 g hrásykur (ég notaði um 60g og mér fannst ekki vanta sætu)
2 msk agave sýróp (ég notaði hunang, átti ekki agave)
5 þroskaðir bananar
1 msk kókosolía
200 g heilhveiti
2 tsk lyftiduft
1 tsk salt
25 g haframjöl
+ 25 g haframjöl til að strá yfir
+ saxaðar hnetur ef vill


Byrjað er á því að hræra eggið lauslega saman við sykurinn - gott að setja smá og smá útí í einu.
Bananarnir eru maukaðir með gaffli og þeim hrært útí eggjablönduna ásamt olíunni og agave. 
Í stóra skál eru þurrefnunum blandað saman. Hér bætti ég við um 2 msk af söxuðum heslihnetum.
Bananablöndunni er svo hellt útí stóru skálina og varlega blandað saman við þurrefnin, það á að velta þessu rólega.
Klæðið brauðform með bökunarpappír (ég notaði einnota formkökuform sem til eru í matvöruverslunum) og hellið deiginu útí. Stráið haframjölinu yfir.
Hjá Sigrúnu stendur að það eigi að baka brauðið í 40-45 mín. Ég held hins vegar að maður verði að meta það út frá stærð banananna þar sem brauðið mitt var ennþá blautt í miðjunni eftir 45 mín. Ég hafði það því í um 65 inní 180° heitum ofni. Ég mæli með að stinga tannstöngli í miðju brauðsins (þar sem það er þykkast) og ef hann kemur alveg hreinn út, þá er brauðið reddí.


Borðist frekar heitt og með smjöri :)

Hafragrautsmúffur

Hér er önnur uppskrift að morgunmat "on the go" eða fínasta millimál. 

Þetta er í raun bara hafragrautur í möffinsformi :)

Mjög sniðugt og hrikalega gott ef maður setur eitthvað smá útí eins og ber og hnetur.

Mörgum gætu þótt þessar þurrar en það er sennilega af því að maður býst við að þetta séu "eftirréttar" möffins en í raun er þetta bara hollur hafragrautur og því ekki mjög djúsí. Enda alveg sykurlaust og rosa hollt!

Ég bjó til mína eigin uppskrift, ég hef notast við nokkrar mismunandi og þetta er blanda af þeim.

Hafragrautsmúffur með hind&bláberjum og heslihnetum

2 þroskaðir bananar (eða 2-3 krukkur af eplamauki/barnamat - ég nota alltaf bara það sem lítur út fyrir að vera um 2 bananar, fer eftir stærð krukkunnar)

2 eggjahvítur (eða 1 egg)

1 tsk vanilludropar

(hér má setja smá sætuefni ef maður vill eins og 1 tsk af agavesýrópi/hunangi)

5 dl haframjöl eða tröllahafrar

1 msk kanill

1 tsk lyftiduft

1 og 3/4 - 2 dlmjólk að eigin vali (kúamjólk/rísmjólk/soja...) 

(ég notaði 2 dl, einn dl léttmjólk + einn dl AB mjólk)

Í þetta skiptið setti ég slatta af frosnum hindberjum og bláberjum og setti hakkaðar heslihnetur ofan á hverja og eina. Næst ætla ég þó að setja bara hneturnar beint í deigið þar sem þær voru svolítið að detta af..

Blautefnin eru hrærð saman (bananarnir eru stappaðir fyrst ef þeir eru notaðir) - síðan þurrefnin útí. Mjólin er sett síðust, best að byrja að setja 1 og hálfan dl og fikra sig svo áfram, þetta á að vera nokkuð blautt. Þetta er sett í sílikonmöffinsform (þar sem það er engin olía/ekkert smjör þá er ekki hægt að notast við pappaform)

Bakað í um 25-30 mín við 180°. 

Ég mæli með að leyfa múffunum að kólna alveg og setja svo í plastpoka og inní frysti. Þær geymast kannski í nokkra daga inní kæli en þær eru alveg jafn góðar ef maður frystir þær bara strax og setur svo í 30 sek í örbylgjuofninn. 

...Það er líka ótrúlega gott að setja smá slettu af grískri jógúrt ofan á þær :)

Hádegisstund

Ég sakna virkilega notalegu hádegisstunda okkar Eyþórs sem við áttum í Vín.
Við vorum oftast heima bæði í hádeginu og dunduðum okkur í eldhúsinu saman og útbjuggum fínasta hádegismat undir rólegum austurrískum útvarpstónum.
Já þetta var ljúfur tími...en þar sem við erum bæði í fullri vinnu hér á landi og meirasegja í sitthvoru bæjarfélaginu þá hafa þessar hádegisstundir okkar takmarkast við eina og eina hádegisstund um helgar.


Síðustu helgi prófaði ég nýja uppskrift af brauði en ég á það til að vera dugleg að baka brauð. Ég elska að gera auðveldar gerlausar brauðuppskriftir sem taka enga stund að hræra í og bragðast oftar betur en rúnstykki úr næsta bakaríi. Ég á oftast allt í uppskriftirnar og svo líður mér vel þegar ég veit nákvæmlega hvað er í því sem ég borða.


Uppskriftina af brauðinu fékk á fallega matarblogginu hjá Evu Laufey Kjaran og ég mæli hiklaust með þessari auðveldu og fljótlegu uppskrift.

Súkkulaðibita blondínur

Blondies eru svipaðar og brownies nema ekki með súkkulaðigrunni en ég setti þó súkkulaðibita í þessar blondínur. Þær eru vel í hollari kantinum - ekkert smjör, ekkert hveiti og ekki það mikill sykur. Þær eru með hnetusmjöri sem gerir virkilega góðan keim og svo setti ég valhnetur útí líka.

En aðalinnihaldsefnið er..... kjúklingabaunir!

Já, það er hægt að gera mjög gómsætar kökur úr baunum. 

Mæli með að þið prófið þar sem flestir sem hafa smakkað þessar hafa verið mjög ánægðir, sérstaklega samstarfskonur mínar sem hafa ekkert á móti því að ég komi með hollustugóðgæti af og til í vinnuna :)

Súkkulaðibita blondínur

uppskrift frá Chocolate Covered Katie

1 dós kjúklingabaunir

3/4 tsk lyftiduft 

1/8 tsk matarsódi

1/4 tsk salt

1 dl sykur (á að vera 1 og 3/4dl - það má alveg ef þið viljið ekki minnka sykurmagnið)

2 tsk vanilludropar

0,6 dl hnetusmjör

0,6 dl hafrar

slatti af súkkulaðibitum/söxuðu suðusúkkulaði (ég setti um 1,5 dl)

1/2 dl saxaðar valhnetur (ekki í of litla bita samt)

 

Byrjið á því að hreinsa kjúklingabaunirnar vel (gott að setja í sigti og láta renna vel af vatni á þær). 

Því næst setjið allt nema súkkulaðið í matvinnsluvél og blandið þangað til nokkuð mjúkt og slétt.

Setjið súkkulaðibitana útí og hrærið með sleif.

Ég setti deigið síðan í ofnotaða sílíkonmöffinsformið mitt og fékk 11 blondínur útúr því.

Það er líka hægt að setja í kassalaga form en deigið er t.d. of lítið fyrir skúffukökuformið sem ég á - flestar uppskriftirnar hennar Katie eru frekar litlar þannig að ég myndi passa að hafa formið í minna lagi svo að kökurnar verði ekki þunnar. Held þær séu bestar þykkar og djúsí..

Bakið við 180° í um 30 mín.

Eggjahvítumúffur

Eggjahvítumúffur eru algjör snilld - eiginlega ommiletta "on the go"

Ég er farin að gera eggjahvítumúffur ansi oft þar sem Eyþóri finnst gott að grípa með sér morgunmat en ég borða þær eiginlega alltaf sem millimál, mér finnst mjög fínt að fá mér svona 2 plús ávöxt seinnipart dags þegar ég er svöng. Þær eru fljótgerðar, rosalega hollar og sniðugar fyrir þá sem nenna ekki að elda sér ommilettu alltaf þegar á að nota eggjahvíturnar. Ég nota oftast uppskriftina sem ég fann í fyrra á Heilsupressunni hjá Svövu Rán (sem ég finn ekki akkúrat núna og nenni ekki að leita - ég seivaði hana í tölvuna fyrir löngu). Það er fínasta grunnuppskrift, fáránlega auðveld og tekur enga stund að hræra í þetta.

Eggjahvítumúffur
8 eggjahvítur
200 g kotasæla
1 msk kókoshnetuhveiti eða 2 msk annað hveiti (ég nota kókos af því að ég á það og að það þarf minna af því en þær verða örugglega alveg eins með venjulegu hveiti/spelt)
1 tsk lyftiduft
hvaða krydd sem er


Þessu er öllu hrært saman í skál og ATHUGIÐ að "deigið" er rosalega þunnt! Maður trúir varla að þetta eigi að vera svona en hafið engar áhyggjur :)


Múffurnar eru svo bakaðar í ofni við 180-200° (hversu dökkar þið viljið hafa þær) í amk. 30 mín en ég hef þær bara þangað til þær eru orðnar vel dökkar, það tekur oftast aðeins lengri tíma en hálftíma.

Ég nota alltaf sílíkon möffinsform, það er örugglega erfitt að nota pappaform, mig grunar að deigið myndi leka útum allt...


Svona er hægt að hafa þær einfaldar en ég set alltaf eitthvað gums í.


Síðast gerði ég 2x uppskrift, í annan skammtinn setti ég:
- Skinku
- Mexíkó-ost
-Paprikukrydd
-Oreganó
- Salt&pipar


Í hinn skammtinn setti ég:
- Tómata
- Parmesan ost (í deigið og líka ofan á í lokin)
- Basil


Þær geymast ótrúlega lengi í nestisboxi inní ísskáp, ég set þær svo örskamma stund í örbylgjuna en það er óþarfi, þær eru fínar líka kaldar. 
(Veit ekki hvort þær haldist góðar ef þær eru frystar - ég hef aldrei þurft þess því við klárum þær eiginlega alltaf á rúmri viku)

Fyrsta grill sumarsins

Um leið og sólin fór að skína var farið og náð í grillið niðrí geymslu. Reykjavíkurdömurnar komu með undursamlega góðan fisk frá Fylgifiskum sem við grilluðum á svölunum mínum í blíðskaparveðri (svona miðað við það sem á undan hefur gengið). Grillaður (Fylgifiska) fiskur er eitt það besta sem ég fæ, maríneringarnar þeirra eru svo ótrúlega góðar alltaf og fiskurinn sjálfur líka. 
Sumarlegu diskamotturnar voru teknar fram sem og nýja stellið sem ég var að fá í afmælisgjöf frá ömmu minni sem er ansi dugleg í glerlist :)
Eftir að vera passlega saddar eftir fiskinn (sem er annað sem ég elska við fisk) ákváðum við að misþyrma maga okkar svolítið með því að háma í okkur ávaxta/súkkulaðifondú.
Við lágum svo hálf meðvitundarlausar í sófanum það sem eftir lifði kvölds..


Yndislegt kvöld með stelpunum mínum, það er ótrúlegt hvað smá sól getur gert stemninguna góða (þó kuldaskræfan sé enn í vetrarúlpunni þessa dagana...)