Hringferð - Austurland fyrri hluti

Jæja..hvert vorum við komin á hringferðinni.. 
Við komum á Austurlandið um kvöldið þar sem móðurfjölskylda mín var í þremur bústöðum á Eiðum sem er rétt fyrir utan Egilsstaði. Þar áttum við virkilega góða 5 daga, vorum þegar mest var 20 manns og fórum í dagsferðir um Austurlandið með afa leiðsögumanni í fararbroddi en hann átti heima á Neskaupsstað og Eiðum þegar hann var yngri. Móðurbróðir minn hefur einnig búið á Egilsstöðum og Seyðisfirði og hann var enginn eftirbátur afa í fararstjórahlutverkinu. 

Atlavík

Skriðuklaustur, hið glæsilega hús Gunnars Gunnarssonar rithöfundar. 

Við keyrðum að Kárahnjúkavirkjun, það var svakalegt mannvirki. Get ekki ímyndað mér hvernig það var að vinna þarna um hávetur að byggja stíflu og stafla grjóti. Hljómar ekkert rosalega vel..

Eyþór með "málverk" í bakgrunni. Þarna sjáiði gjána sem Ómar Ragnarsson flaug í gegnum á flugvélinni sinni til að sýna fólki náttúruna á Kárahnjúkum.

Þetta er útsýnið sem Kjarval hafði þegar hann fór í litla kofann sem hann átti á Austurlandi.

Njarðvíkingarnir

Hér erum við á Borgarfirði Eystri að skoða lunda, þeir skríða alltaf ofan í þessar holur á klettinum.

Hér er Bræðslan haldin.

Á höfninni á Borgarfirði Eystri.

Glútenlausar vanillumúffur með súkkulaðikremi

 

Ég á ennþá smá kókoshnetuhveiti sem ég keypti í Kosti fyrr um árið. Það endist vel ef maður geymir það inni í ísskáp. Ég hef einu sinni áður sett inn uppskrift með kókoshnetuhveiti en hveitið hefur þá eiginleika að draga vel í sig allan vökva og því þarf maður að nota lítið magn af mjöli en mikið magn af t.d. eggjum. Þar sem ég á oftast eggjahvítubrúsa þá verður þetta því voða hollt: lítið hveiti og fullt af eggjahvítum :)

Ég hef aldrei áður gert vanillu cupcakes en mér finnst þær alltaf góðar þegar ég hef smakkað þær. Svo fannst mér þær passa best við súkkulaðimúsina sem ég hafði gert deginum áður, en mig langaði að prófa að nota það sem krem. Það kom mjög vel út, en athugið að þetta er ALLS EKKI neitt líkt djúsí smjörkremi. Mig grunar að þeir sem eru ekki vanir að borða stundum aðeins hollara góðgæti, munu kannski ekki alveg samþykkja þetta sem "krem". En góð var músin þó og held ég að flestir myndu fíla þetta sem súkkulaðimús með berjum og rjóma. Ég fékk svona súkkulaðimús hjá Herdísi vinkonu minni í haust og við settum hana ofan á hafrakex sem var ótrúlega gott!

Vanillumúffur með kókoshnetuhveiti
pínu breytt uppskrift frá Comfy Belly - gerir um 8 stk.

1,25 dl kókoshnetuhveiti (fæst t.d. í ameríska Kosti og í sumum heilsudeildum stórverslanna)
1/4 tsk matarsódi
1/4 tsk salt
8 eggjahvítur (eða 4 egg)
0,8 dl kókosolía (í fljótandi formi)
1 dl hunang/agave sýróp
vanilla í einhverju formi (vanilludropar/sykur) - ég setti örugglega 2 tsk til að fá mikið bragð

Ég blandaði þurrefnunum saman fyrst í matvinnsluvél og svo blautefnunum og blandaði vel (mér finnst gott að nota matvinnsluvélina til þess að slétta út hveitiklumpana). Sett í pappírsform og svo ofan í sílíkonform til þess að fá flottu lögunina. Bakað við 180° í um 20 mín.

Súkkulaðimús/súkkulaðikrem
frá Pure Ebbu

1 hæfilega þroskað avókadó
1 þroskaður banani
4 msk fljótandi kókosolía
3 msk agave sýróp
3 msk kakó
skvetta af vanilludropum & salti

Blanda öllu í matvinnsluvél/blender og voila! 
Reyndar er gott að setja þetta inn í ísskáp í smá tíma til þess að leyfa þessu að stífna aðeins.

Hringferð - Suðurland seinni hluti

Annan daginn keyrðum við frá Skaftafelli og alla leið á Austurlandið.

Jökulsárlón var að sjálfsögðu skoðað ásamt öllum þeim milljón túristum sem þar voru.

Kirkja á einkavegi sem við reyndum að komast í. Pirrandi hvað næstum allar sveitakirkjur á Íslandi eru læstar!

Á Hoffelli eru nokkrir náttúrupottar, vel heitir og fínir. Fínasta aðstaða sem bóndinn á jörðinni hefur gert, það var æðislegt veður þennan dag og þetta var verulega notalegt..

Við fórum í smá pikknikk á Höfn í Hornafirði og lékum okkur svo í aparólunni.

Fjöllin á leiðinni austur eru mörg hver ansi falleg.

Hér var verið að ná í eðal sand fyrir ömmu. Það var viðbjóðslegt rok og við vorum öll í sandi eftir þetta.. samt ekki jafn slæmt og á Dettifossi. Og já við vorum á litla Aygoinum allan hringinn, hann stóð sig bara ágætlega..

Þetta eru eggin í Gleðivík en sú gleðilega vík er staðsett í Djúpavogi. Þar í bæ fékk ég makkarónur í fyrsta sinn á Íslandi á kaffihúsinu Langabúð. Þær voru bara nokkuð góðar.

Hringferð - Suðurland fyrri hluti

HÆ aftur! Og afsakið bloggpásuna en ég ákvað bara að fara alveg í sumarfrí þegar ég tók mér sumarfrí frá vinnunni. 

Sumarfríið var yndislegt, við fórum hringinn í kringum landið á 9 dögum og eftir það vorum við heima í  smá tíma og nutum þess að gera akkúrat ekki neitt.

Ég er með nokkrar færslur með fallegum myndum sem Eyþór minn tók langflestar og mig langar að deila með ykkur.

Landið okkar er svo dásamlegt, svo fallegt og einstakt! Ég á eftir að sakna þess þegar ég fer á vit ævintýranna og flyt út eftir 2 mánuði...

Við byrjuðum hringferðina á Suðurlandinu.

(þið sem eruð vinir Eyþórs á facebook hafið sennilega séð allar þessar myndir nú þegar..)

Við fundum repjuakur á Þorvaldseyri..

Fundum loks Seljavallalaug

Skoðuðum bæði Seljalandsfoss og Skógafoss

Vitinn á Dyrhólaey var mjög flottur í stórkostlegu umhverfi.

Reynisdrangar í Vík í Mýrdal

Við enduðum daginn á því að tjalda í Skaftafelli.

...more to come!

Árshátíð GS 2012

Ég á fullt af myndum handa ykkur og einhverjum uppskriftum en það verður að bíða betri tíma sökum þess að kortalesarinn er uppí sveit og svo er ég að fara í SUMARFRÍ næstu tvær vikur þar sem ég verð mestmegnis á ferð um landið.


Eeen ég stel þá bara myndum frá Hildi Guðbjörgu minni frá æðislegu árshátíðarhelginni okkar í háskólavinahópnum. Á dagskrá helgarinnar var: forréttur og kampavín sem beið okkar í bústaðnum mínum þegar við mættum, grillaður fiskur, árshátíðarkaka og meira gotterí, pub quiz, skókastleikur, beer pong, hádegis brunch úti á palli í sólinni og 17 stiga hita, frisbígolf og kubb á Úlfljótsvatni, þrautaleikur á leiðinni á Laugarvatn þar sem við fórum í Fontana spa.

Upprifjun sumarið 2011 - Súgandisey

Þar sem þetta blogg var ekki orðið til í fyrra og þar sem ég á enn fullt af fallegum myndum í tölvunni sem húka bara þar og hafa heldur ekki farið á facebook margar hverjar, þá langar mig að rifja aðeins upp sumarið 2011 og deila með ykkur myndum. 

Þessar eru teknar við sólsetur á Súgandisey í Stykkishólmi en við eyddum þar nokkrum dögum í ágúst í fyrra með móðurfjölskyldunni minni. 

Afi minn ólst upp fyrstu árin sín í þessu bárujárnshúsi alveg niður við sjó. Frændi hans á nú húsið og hefur verið að gera það upp. Fjölskyldan fékk að gista þar en við Eyþór og Páll Orri gistum í hjólhýsinu sem sést þarna á myndinni.

Stykkishólmur er að mínu mati eitt fallegasta bæjarstæði á landinu. Ég er rosalega hrifin af Snæfellsnesinu yfir höfuð en við fórum þangað í nokkra daga í fyrrasumar og einnig sumarið 2009. Þetta sumarið ætlum við þó að sleppa ferð á Snæfellsnesið en ferðast frekar um Suður, Austur og Norðurland. 

Hollt súkkulaðikonfekt

Sorrý með mig, en það er verið að njóta sumarsins stutta sem við höfum á Íslandi. Ég var á fullu í síðustu viku að skipuleggja hina árlegu óvissu-árshátíð fyrir háskólavinkonurnar sem við héldum hátíðlega um helgina. Við skemmtum okkur konunglega á Suðurlandi í stuttbuxnaveðri og ég ætla að stela myndum frá stelpunum ef þær reynast birtingarhæfar..


En annars er hér enn ein uppskriftin af hollum bitum. Þetta er aðeins meira djúsí uppskrift heldur en hinir döðlubitarnir sem ég hef sett hingað inn þar sem í þessari uppskrift er bæði kókosolía og smávegis sýróp. Ég veit ekki hversu margar svona svipaðar uppskriftir ég hef prófað en þessi finnst mér æði, kokosolían gerir mikið fyrir þessa bita en í upprunalegu uppskriftinni (sem ég sá á facebook síðu Heilsuhússins) er þó óþarflega mikið af olíu og of lítið af döðlum þannig að ég breytti uppskriftinni aðeins.


Súkkulaðikonfekt
um 20 döðlur - saxaðar (ég klippi þær með skærum, hverja döðlu í svona 3-4 bita)
4 msk kakó
3-4 msk kókosolía (um að gera að prófa 3 en bæta við ef þetta er ekki nógu blautt - í upprunalegu uppskriftinni voru 6 msk og mér fannst deigið aaaallt of olíukennt)
4 msk hnetusmjör
2 msk sýróp
1 tsk vanilludropar
ögn af salti


Allt mixað saman í matvinnsluvél. Uppskriftin er heldur lítil þannig að ég setti hana bara beint í kassalaga nestisbox og svo inní frysti. Hún þarf að vera þar í amk. 30 mín en eftir að maður tekur bitana úr frystinum tekur þá enga stund að þiðna.