Portland dagur 2

Alltaf þegar við ferðumst til nýrrar borgar, þá reynum við að fara í önnur hverfi en miðborgina til að komast aðeins burt frá aðal túristasvæðinu. Á sunnudeginum langaði okkur í brunch og enduðum á því að fá einn besta ameríska morgunmat hingað til í Bandaríkjunum. Við keyrðum í Hawthorne hverfið sem er semi "hipstera hverfi" borgarinnar.. æj þið vitið hvað ég meina, fullt af vintage - og thrift shops, skrítnum veitingastöðum og ungu fólki. Oftast eru þetta líka fyrrum eða núverandi innflytjendahverfi. Ef einhverjum finnst jafn gaman og okkur að heimsækja svona hverfi, þá megiði sko alveg hafa samband ef þið annaðhvort viljið meðmæli eða mælið með skemmtilegum hverfum í ýmsum borgum hér í USA en við erum að fara heimsækja nokkrar borgir á næstunni, byrjum á San Francisco næsta laugardag!

En aftur að Hawthorne hverfinu.. við vorum í voða litlu myndatökustuði þennan daginn en hér fyrir neðan eru þó skemmtileg hús og flottir skór.. :)

Annars er ein mynd frá Chinatown sem fékk að laumast með, getiði hver!

Portland dagur 1

Fyrri daginn í Portland löbbuðum við miðbæinn endilangan eins og maður gerir oftast fyrsta daginn í nýrri borg. Við fórum að sjálfsögðu í Powell's Books sem er stærsta bókabúð í heimi, byggingin nær yfir heila húsalengju (block). 

Síðan var gerð tilraun til þess að smakka á hinum heimsfrægu Voodoo kleinuhringjum þar sem vinsælasti kleinuhringurinn er með beikoni ofan á.. og svo eru alls konar skrítnar týpur í boði (sem passar vel við borgina þar sem þetta er algjör hippaborg og slagorð borgarinnar er víst "Keeping Portland weird"). Röðin í Voodoo Doghnuts var hins vegar aðeins of löng fyrir okkur Íslendingana til þess að nenna að standa í henni en við höfum tekið eftir því að Ameríkönum finnst ekkert mál að bíða í röðum fyrir utan veitingastaði á meðan við drífum okkur út um leið og við heyrum "það er um hálftíma bið."

Um kvöldið var okkur boðið í kvöldmat til Andrey og Olgu sem eru vinahjón Anne, þýsku vinkonu minnar úr UW sem var akkúrat líka í Portland þessa helgi. Anne var áður skiptinemi í Valencia á Spáni þar sem hún kynntist Andrey sem býr í Portland. Þar áttum við áhugavert spjall, borðuðum góðan mat og enduðum kvöldið á að fræðast um Monsanto og spillinguna sem á sér stað í matvælabransanum hér í Bandríkjunum með því að horfa á Food Inc en það var vel við hæfi í þessari hippa/umhverfissinuðu borg.

Langa röðin fyrir utan hina margfrægu kleinuhringjabúð.

Þessar nenntu heldur ekki að bíða í röðinni eftir kleinuhringjum.

Cannon Beach and Sellwood/Portland, Oregon

Við héldum áfram leið okkar frá Long Beach, Washington yfir fylkjamærin til Oregon fylkis. Þar keyrðum við í gegnum Astoria og Seaside en ákváðum að eyða deginum í Cannon Beach sem er lítill sjarmerandi strandbær þar sem þessi stóri klettur, Haystack Rock stendur. 

Síðan keyrðum við til borgarinnar Portland eða nánar tiltekið til Sellwood sem er hverfið sem við gistum í. Við leigðum herbergi hjá hjónum í gegnum AirBnB og það var yndislegt!

Við röltum um Sellwood hverfið og þar voru nokkrir food trucks en það er voða vinsælt hér í Norð-vestur Bandaríkjunum.

Long Beach, WA

Við fórum í ferðalag í lok maí þegar það var löng helgi hér í Ameríkunni. Við leigðum bíl og keyrðum til Oregon, sem er næsta fylkis fyrir neðan Washington. Fyrsti áfangastaður var Long Beach, sem er sumarleyfisbær neðst í Washington fylki, nálægt fylkjamörkunum. Við lögðum af stað á fimmtudegi eftir skóla hjá mér og keyrðum framhjá fullt af bæjum, m.a. Centralia þar sem tveir vinir mínir hafa verið skiptinemar og Olympia sem er höfuðborg Washington fylkis. Ég hafði áður keyrt þessa leið með host foreldrum mínum þegar ég var 17 ára en þau samþykktu ósk mína um að koma við í smábænum Aberdeen þar sem Kurt Cobain ólst upp. Meira skítapleisið sem það er! 

Við komum seint að kvöldi á áfangastað okkar sem var sumarbústaður host foreldra minna en Jim og fjölskylda hans eiga lítið hús við ströndina. Þangað fór ég með þeim í spring break þegar ég var í high school og það var ansi gaman að glugga í gestabókina og skoða hvað við Stephanie vinkona mín (sem fékk að koma með) höfðum skrifað um dvöl okkar í bústaðnum, í apríl 2005.

Samkvæmt frásögn okkar frá 2005 eyddum við miklum tíma í að spila Pakk við host systur mínar, horfðum á vídjó, fórum í gönguferðir á ströndinni, ég las Da Vinci Code og fór í golf með Jim og svo tók ég myndir á ströndinni fyrir ljósmyndakúrsinn í skólanum mínum.

Samkvæmt hliðinu að ströndinni er þetta lengsta strönd í heimi!

Skýin voru svakaleg!

Long Beach bærinn er svaka krúttlegur og heimamenn mjög indælir.

Bæjaryfirvöld í Long Beach ekki alveg með nafn Leifs Eiríkssonar á hreinu.

Hvað sem fólki kann að finnast um hoppumyndir þá eru þær orðnar að hefð hjá okkur þegar við ferðumst og því er ekki hægt að hætta þeim núna.. svo er amma mín svo afskaplega hrifin af þeim og hvað gerir maður ekki fyrir aðal aðdáanda bloggsíðunnar ;)

Alki Beach/West Seattle

Þessi vika hefur verið mjög næs þar sem sólin ákvað að láta sjá sig og svo er þægilega hlýtt úti. Það er brjálað að gera í lokaverkefnum í skólanum (allir tímar búnir) þannig að við erum inni að læra og vinna mestallan daginn en tökum okkur allavega 2-3ja tíma pásu til þess að fara út og leika okkur aðeins í borginni! Það er svo stuttur tími eftir að við erum að reyna að gera sem mest, svona meðfram heimavinnunni.. 

Við kíktum til West Seattle fyrr í vikunni sem er hverfi alveg hinu megin við miðbæinn. Við röltum meðfram ströndinni, fengum okkur víetnamskan mat og horfðum á fólk spila blak og grilla smores. 

 Djöfull brá mér þegar ég labbaði yfir þetta fyrst..hjólabuxurnar björguðu mér alveg.. ;)

 Fullt af high school krökkum, sennilega að fagna komandi útskrift.

 Æðislegt útsýni frá vesturhluta borgarinnar (eins og víðast hvar í borginni reyndar)

 (Ókunnugt fólk er ALLTAF að bjóðast til þess að taka mynd af okkur saman..)