Hringferð - Norðurland seinni hluti

Fullt af myndum frá síðustu tveimur dögum hringferðarinnar á Norðurlandinu. 

Mývatn bauð upp á ansi magnað landslag, rigningu, mý (sem við forðuðumst með því að fara á tjaldsvæðið sem var ekki nálægt vatninu), skemmtilegt kúafjóskaffihús, kósýkvöld í tjaldi með yatsi og bókalestri, ískalda nótt þar sem sofið var með húfu og vaknað með frosinn nebba).

Við reyndum að kíkja í sveitakirkju sem tilheyrði þessum bóndabæ en hún var auðvitað læst. Þessi vinalegi hundur kom hins vegar og heilsaði upp á okkur.

Við elskum Siglufjörð! Yndislegur bær, við röltum þar um á sunnudegi og það var eiginlega enginn á ferli. 

Við vorum orðin þreytt á að sitja í bílnum og tókum göngutúr um þetta svæði. Lágum svo og sóluðum okkur í góða stund áður en við mundum að vikunni áður var talið að ísbjörn hefði verið á svæðinu...

Stuðlaberg á Hofsósi.

Fallegt á Hólum í Hjaltadal þar sem uppáhalds 101 Rvk. fjölskyldan mín eyðir sínum jólum og sumrum.

Við keyrðum mikið þennan sunnudag og vorum komin aftur heim á Reykjanesbraut um miðnætti á sunnudegi. Eyþór tók þessa fallegu mynd af Snæfellsjökli í gegnum brotna rúðu á yfirgefnu ótilbúnu húsi á Vatnsleysuströnd.                                                                 

Brúðkaupssumar

Ég sem hafði aldrei verið gestur í brúðkaupi áður fór í tvö slík í sumar og fór í eina athöfn sem fiðluspilari. Öll þessi þrjú brúðkaup voru mjög ólík en öll rosalega falleg.

  

Ég spilaði reyndar á fiðluna í tveimur brúðkaupum, þarna spilaði ég meirasegja brúðarmarsinn inn og út, það kom bara mjög vel út :)

Sæunn, systir Eyþórs giftist sínum heittelskaða í lítilli og náinni athöfn í hverfiskirkjuni í Reykjavík. Virkilega falleg stund og gömlu loks gift eftir um 11 ára samband held ég! (Eyþór tók þessar fallegu myndir)

Við háskólavinkonurnar lögðum af stað upp í sveit í grenjandi rigningu og roki en lentum svo í þvílíkri blíðu í Fljótshlíðinni (fyrir utan smá rok). Hér er partur af hópnum á leiðinni í sveitakirkjuna.

Elsku fallega Hildur brúður í hópmyndatöku (vantaði að vísu Ívar Orra)

Krakkarnir mínir í salnum rómantíska (sjáið efstu myndina, svo fallegt og kósý!)

Og svo yndislegu brúðhjónin nýgift, ég held ég hafi aldrei séð krúttlegri mynd!!

Við Edda Rós spiluðum svo í brúðkaupi Hafdísar og Harðar, ég varð að setja þessa mynd inn því það sést glitta í fiðluleikarana uppá efri hæðinni ;) Við áttum ekki orð yfir fegurð brúðarinnar og systranna, þetta var æðisleg athöfn, mjög persónuleg og afslöppuð.

(ath. flestar myndirnar eru frá vinkonum mínum eða vinum brúðhjónanna, smá stel af facebook...)

Karamellukaka með rice crispies og banana

Þessi kaka er syndsamlega góð enda ansi mikið af gúmmelaði í henni. Upphaflega eru þetta karamellu rice crispies stykki en ég vildi gera meiri köku úr þessu. Ég skar niður tvo banana og setti ofan á og svo þeyttan rjóma. Útkoman var heldur betur góð. Bananinn bráðnar hálfpartinn og passar mjög vel við karamelluna.

Karamellukaka með rice crispies og banana

100 g rjómasúkkulaði
100 g karamellusúkkulaði (t.d Galaxy Caramel, Rolo eða Nóa Síríus karamellu Pipp)
4 msk sýróp
100 g smjör 
(ég minnkaði aðeins magnið og setti um 2-3 msk af sýrópi og 50g smjör)
- Þetta er allt brætt saman í potti á vægum hita.

Síðan er potturinn tekinn af hellunni og slatta af rice crispies skellt útí. Blanda vel saman og setja helst inn í frysti.

Rétt áður en kakan er borin fram er gott að skera niður tvo (og hálfan) banana og setja ofan á og síðan þeyttan rjóma.

Random símamyndir

Bleikar blöðrur í Hólavallakirkjugarði á kvenréttindadaginn 19.júní

Ég elska að vinna í miðbænum.

Hringferðin byrjaði á brúðkaupi!

Við Sædís og Kristrún fórum á Lebowski bar, fengum okkur djúsí mjólkurhristinga (mæli með karamellu) og sömdum ljóð handa gæsinni okkar.

Gæsin fékk svo svona sæta köku..

Rómó hjá tveimur ósýnilegum sem fengu sér hvítvín á Káratorgi.

Ég fékk mér æðislegt salat á Kaffi Krús á Selfossi eftir að hafa haldið fyrirlestur á Minni Borgum.

Fallegasti bíll sem ég hef séð í brúðkaupi Hafdísar og Harðar þar sem við Edda Rós spiluðum á fiðluna.

 

Við Eyþór stukkum ásamt nokkrum strákum fram af brú í jökulkalda ána um verslunarmannahelgina rétt hjá bústað foreldra minna. Veðrið var æðislegt og þetta er besti þynnkubani sem hægt er að hugsa sér.. (pínu erfitt að henda sér útí enda eru þetta um 7 metrar!)

Gerði kjúkling í chili hvítvínssósu sem varð  aðeins of sterkur (af því að ég ákvað að hafa steinana úr chili-inu með)

Maja

Þetta er Maja og hún er frá Serbíu.

Hún kom og gisti hjá okkur eina nótt í síðustu viku en við skráðum okkur nýlega á Couchsurfing.com. 
Þar getur fólk búið sér til profile og annað hvort tekið á móti fólki og leyft því að sofa á sófanum hjá sér - eða  fengið að sofa á sófum víðsvegar um heiminn þegar verið er að ferðast.
Okkur langar jafnvel að prófa þetta þegar við munum ferðast eitthvað um löndin þrjú sem við munum búa í næstu tvö árin. Þess vegnar langaði okkur líka að prófa að leyfa fólki að gista hjá okkur og erum við nú þegar búin að leyfa 5 manns að gista hjá okkur síðastliðna viku.

Maja er sálfræðinemi og fimleikaþjálfari og býr í næststærstu borg Serbíu, Novi Sad. 
Áður en hún kom til Íslands hafði hún ferðast ein (og á puttanum) um Noreg og Færeyjar og var búin að eyða þremur vikum á Íslandi áður en hún kom til okkar daginn áður en hún flaug aftur út.
Hún skilur og talar norsku og íslensku en hún lærði það sjálf í gegnum internetið.

Það var mjög gaman að spjalla við hana og fræðast um hana, Serbíu og ferðalögin hennar.

Hringferð - Norðurland fyrri hluti

Áður en við komum til Akureyrar skoðuðum við Dettifoss í brjáluðu sandroki. Það var verulega erfitt að sjá þrátt fyrir að sólgleraugun gátu nýst sem skjól frá sandinum. Við reyndum að þrífa allan sand úr augnkrókum og eyrum en það var nánast ómögulegt. Dettifoss var magnaður enda er hann einn aflmesti foss Evrópu.

Við fórum svo í Ásbyrgi en við vorum bæði að koma á þennan fallega stað í fyrsta skipti. 

Við enduðum svo í kvöldmat á höfninni á Húsavík.