Austin seinni dagur

Seinni daginn byrjuðum við aftur í hverfinu okkar, í þetta sinn með cupcake og mjólk í hjólhýsinu á horninu í morgunmat. Við röltum síðan meira um hverfið og skoðuðum litlu búðirnar. Við keyrðum svo í háskólahverfið og fórum í uppáhalds búðina okkar Buffalo Exchange sem er í nokkrum stórborgum hér í Ameríku. Við reyndum síðan að rölta um miðbæinn en það var erfitt í steikjandi hitanum þannig að næst á dagskrá var að fá sér pulsu og drykk hjá Frank en bæði matur og drykkur slógu í gegn hjá okkur.

Við héldum göngu okkar áfram og eftir að Eyþór hafði óvart fengið sér Chili frostpinna hjá götusalanum sem talaði enga ensku duttum við inn á kaffihús þar sem við fengum besta ískaffið í ferðinni þar sem eigandinn býr til sína eina mjólk sem er svolítið sæt..sem þýðir að ég gat loksins fengið mér kaffi ÁN sýróps!! ;) Þar hittum við ungan dreng sem var nýbúinn að útskrifast úr high school sem vissi helling um stjórnmálaástandið á Íslandi og að Ísland hafi nýlega dregið ESB umsókn sína til baka (sem er í sjálfu sér mjög áhugavert þar sem eiginlega enginn hérna úti veit hvað European Union er..).

Við leituðum að næsta áfangastað með loftkælingu og ákváðum að skoða þinghús Texas fylkis sem er staðsett í miðbæ Austin. Þinghúsið er mjög flott að innan og stútfullt af (frekar sorglegri) sögu. Meðal þingmanna eru þó ekki bara redneck Texas lið eins og margir ímynda sér en við hittum eflaust mesta töffaraþingmanninn, Wendy Davis sem tveimur dögum áður hafði staðið í 11 klst og talað gegn lagafrumvarpi án þess að borða né fara á klósettið. Allt til þess að vernda réttindi kvenna í Texas (nánari lýsing á því hvernig við enduðum á því að hitta þingkonuna hér fyrir neðan..)

Þinghúsið í Texas.

Mjög fallegt inni í byggingunni.

Gaurarnir sem tóku þessa mynd sögðu okkur að annar þeirra væri í pólitík og hefði þess vegna fengið að fara og hitta stjórnmálakonuna Wendy Davis sem hafði nýlega verið í fréttum vegna hetjulegrar framkomu í þinginu þegar Repúblikanar voru að reyna að koma lögum í gegn sem myndu hefta aðgang kvenna að fóstureyðingum. Við hugsuðum með okkur hvað það væri gaman að hitta hana líka..

Og það gerðum við :) Við leituðum af skrifstofunni hennar sem var vel falin og aðstoðarmaður hennar kom fram og byrjaði að spjalla við okkur. Hann sagði þingkonuna vera í viðtali við People Magazine þannig að við gætum ekki hitt hana. Svo þegar við vorum á leiðinni út kemur Wendy út úr skrifstofunni og kallar í okkur og við áttum létt spjall.

Ég gat ekki komist hjá því að leiða hugann að öllum þeim fáránlegu lögum sem hafa komist í gegnum þetta þing en Texas fylki hefur verið talið verulega afturhaldsamt.

Þar sem við sitjum hér á síðasta degi ferðalagsins og hugsum til baka þá var Austin eiginlega skemmtilegasta borgin sem við heimsóttum. Fólkið var fáránlega næs, ég er eiginlega enn að jafna mig á því hvað ALLIR (meirasegja hipsterarnir en Austin er talin vera ein mesta hipsteraborgin í Ameríku) voru rosalega vinalegir og til í að spjalla. Borgin er líka frekar lítil og alls ekki túristaleg. Við vorum líka mjög heppin með matinn sem við fengum í Austin, allar máltíðir voru ótrúlega góðar og staðirnir skemmtilegir. 

Semsagt, við mælum með því að heimsækja Austin!

Austin fyrri dagur

Við tókum næturflug frá San Francisco yfir til Austin sem er höfuðborg Texas fylkis. Austin er ekki beint lýsandi fyrir fylkið en borgin er frekar liberal og töff, ekki beint það fyrsta sem kemur upp í hugann þegar maður hugsar um Texas.

Á móti okkur tók kæfandi hiti kl. 7 um morguninn þegar við lentum. Við lögðum okkur til hádegis og kíktum þá í brunch í South Congress hverfinu þar sem við gistum. Það er að okkar mati skemmtilegasta hverfið í borginni. Þar sem við höfðum í raun ekkert planað og vissum lítið um borgina annað en að í miðri borg er að finna paradís þar sem hægt er að kæla sig niður og sóla sig. Barton Springs er eins konar náttúrúlaug sem var ísköld og hressandi í 35 stiga hitanum. Við eyddum dágóðum tíma í að svamla í lauginni (og stökkva af stökkbrettinu), sóla okkur og tjilla. 

Um kvöldið borðuðum við á veitingastað sem við duttum inn á í hverfinu okkar og við fengum okkur nokkra rétti sem allir voru guðdómlegir, enda allt hráefnið lífrænt og lókal. 

Eyþór fékk sér ískalda dýfu.

Brunch á Bouldin Creek Cafe.

South Congress Ave.

Kúrekinn gaf leyfi fyrir myndatöku. 

Stuttu eftir að við tókum þessa mynd bað skapilli maðurinn í hjólastólnum mig um að ýta honum yfir götuna. Ég sagði að við ættum að bíða eftir græna kallinum og þá öskraði hann "To hell with that!" Þannig að ég dreif mig yfir með hann á rauða kallinum..

We really do, Austin!

San Francisco 2. og 3. dagur

Golden Gate brúin fræga var áfangastaður okkar á öðrum degi okkar í borginni. Þrátt fyrir jákvætt viðhorf okkar þá er það ekki flúið að veðrið spilar alveg helling inn í þegar maður er að ferðast. Við rétt sáum glitta í brúnna en við höfðum það þó í okkur að ganga yfir og kíkja fram yfir handriðið. Það var frekar ógnvekjandi.

Einnig heimsóttum við Haight-Ashbury hverfið en þar varð hippamenningin til um “ástarsumarið 1967”. Nú er þar krökkt af hipsterum. Það hverfi leist okkur hvað best á en þar eru margar áhugaverðar second hand verslanir og veitingar- og kaffihús. Þar eru einnig mikið af skrautlega lituðum húsum í Viktoríustíl en Valgerður var afar hrifin af þeim og einnig af fjölbreytileika húsanna um alla borg.

Síðasta daginn okkar fórum við loksins niður í miðbæinn, þið vitið, þar sem risastór Target, Ross og Forever 21 eru ásamt fínu búðunum og háhýsunum. Það var ekki að heilla okkur þannig að við röltum aðeins lengra og duttum inn á kínahverfið en Chinatown í San Francisco er það elsta í allri Norður Ameríku og mig grunar að það sé það flottasta. Búðirnar eru þó alltaf jafn einhæfar og túristalegar en okkur fannst gaman að sjá byggingarnar og stemninguna. Ef maður labbar aðeins lengra þá tekur við Little Italy en þar fengum við okkur síðdegiskokteil og sátum úti en veðrið var orðið mun betra akkúrat þegar við vorum að fara frá borginni. 

Um kvöldið bauð Patricia, konan sem við gistum hjá, okkur í kvöldmat á pínulitlum pizzastað í hverfinu hennar sem er samkvæmt staðarblöðunum með bestu pizzuna í borginni. Við röltum síðan yfir á lestarstöðina og tókum næturflug á næsta áfangastað okkar, Austin Texas.

Valgerður var hálfbuguð af lofthræðslu þegar við löbbuðum yfir Golden Gate brúnna og ekki varð hún hressari eftir að hafa rekist á þetta. Það var gerð heimildamynd um fólk sem hefur ákveðið að enda líf sitt með því að hoppa fram af brúnni. 

Valgerður varð hins vegar mun hressari þegar hún rakst á þessi fallegu hús í Haight-Ashbury hverfinu.

Við tókum símamyndir á litla pizzastaðnum en hér eru Patricia og nýja vinkona okkar frá Tælandi en hún og ameríski eiginmaður hennar leigja út íbúðir fyrir ferðamenn þar í landi. Patricia ætlar að fara til Tælands í desember og þau ætla að skipta um heimili í mánuð eða svo og þau vildu kynnast aðeins áður en þau ættu í heimilisskiptum. 

Hún var ekkert að grínast með chilikryddið en eftir að hafa hellt því yfir alla sneiðina bað hún þjóninn um að koma með hot sauce því þetta var ekki nógu sterkt.

Fyrir utan pizzustaðinn góða með hressu vinkonu okkar sem við gistum hjá.

Kv. frá Suðurríkjunum!

P.s. frá Valgerði: Ég verð nú að segja að mér finnst soldið leiðinlegt að enginn af þeim 150 manns sem skoðuðu síðustu færslu ýtti á kommentatakkann.. það er alveg sérstaklega gaman að fá komment þegar maður er langt í burtu frá öllum vinum og fjölskyldu. Það væri nú gaman ef Íslendingar væru aðeins meira eins og Ameríkanar, og sérstaklega Suðurríkjabúar sem við erum að umgangast þessa dagana, maður er í sjokki á hverjum degi hvað allir eru næs hérna! Þarf ekki mikið til þess að gleðja mann :)

San Francisco dagur 1

Við afsökum fjarveruna en hana má skýra með því að litli bróðir minn kom í heimsókn til okkar til Seattle síðustu vikuna okkar í borginni. Síðustu dagarnir mínir í náminu voru mjög stressandi en ég þurfti að klára 20 bls. ritgerð áður en hann kom. Það hafðist og við áttum yndislega viku með litla bróður í borginni og í Poulsbo í rosa góðu veðri. Myndir frá heimsókninni koma eflaust ekki inn fyrr en eftir að við komum heim þar sem við erum núna á 3ja vikna ferðalagi. Við ætlum að vinna okkur frá vesturströndinni og yfir til New York þar sem við ætlum að vera í viku áður en við fljúgum heim.

Við sitjum hér í king size rúmi á vegahóteli í Texas, nýbúin að ná okkur í pizzu og nammi og erum að horfa á NBA draftið og því var tilvalið að setja inn myndir frá ferðinni hingað til.
Ég á ekki mikið í þessari bloggfærslu þar sem Eyþór tekur langflestar myndirnar og í þetta sinn náði ég að plata hann til þess að skrifa smá texta um dvöl okkar í San Francisco:

Það er óhætt að segja að við höfðum beðið lengi eftir því að heimsækja San Francisco. Okkur hefur dreymt um að búa í borginni sem að okkar mati átti að hafa allt til brunns að bera. Það var áður en við heimsóttum borgina. Væntingarnar voru miklar og veðrið í ferðinni okkar var ekki upp á marga fiska. Þoka, rok og smá rigningarúði. Við ákváðum að láta það ekki á okkur fá og héldum okkar striki. Í þessari rúmlega þriggja daga ferð okkar náðum við að sjá ansi margt og kynnast borginni nokkuð vel.

Við heimsóttum á fyrsta degi Mission hverfið sem var nokkuð áhugavert en það sló okkur strax hvað borgin var skítug og sóðaleg. Kannski var Seattle bara svona hrein og snyrtileg? En það var strax augljóst að San Francisco er ólík öllum þeim borgum sem við höfum heimsótt áður. Þarna er góð blanda af fólki af öllum uppruna og mikið af skrautlegum karakterum. Það sáum við glögglega þegar komið var í Castro hverfið þar sem samkynhneigðir halda til að mestu leyti. Þar sáust vart tveir karlmenn ganga saman án þess að þeir væru að leiðast. Það gerði svo daginn fyrir okkur að sjá nektarsinna á vappi með litla gyllta sokka fyrir slátrinu.

Eins og sönnum túristum sæmir þá fórum við niður á bryggju 39 þar sem sjá má  hið fræga Alcatraz fangelsi úti á flóanum. Þar var allt morandi í ferðamönnum í fyndnum bolum og hreinlega of þröngt á þingi fyrir okkar smekk.

Við höfum gaman af því að gista hjá heimamönnum og að þessu sinni var gestgjafi okkar ein eldhress og áttræð. Hún var í alla staði frábær. Hún sótti okkur á lestarstöðina og var búin að undirbúa fyrir okkur lista með öllum þeim upplýsingum sem hún taldi nauðsynlegar. Sú gamla hefur marga fjöruna sopið og sagði okkur margar áhugaverðar sögur af ferðalögum sínum um heiminn. Það er óskandi að maður verði svona lífsglaður á hennar aldri. 

Lesbíupar með íslensku fitness klippinguna.

Ófá tónleikaveggspjöld hafa verið heftuð á þennan rafmagnsstaur fyrir utan Roxie Theater í Mission hverfinu.

Svona var útsýnið okkar þegar við borðuðum hádegismat í Castro hverfinu.

Fyrsta kvöldið prófuðum við í fyrsta skipti eþíópískan mat en þjóðarrétturinn er kjöt og grænmeti í nokkuð sterkri sósu. Maður rífur bita af injera brauðinu sem er á hinum disknum og notar brauðið og fingurna til að skófla matnum upp í sig. 

Þessi var mjög hress. Hann var með dúndrandi hip hop tónlist í gangi og dillaði sér við músikina en pósaði þó þegar hann þaut framhjá okkur.

 Það var ansi grámyglulegt þegar við horfðum yfir á eyjuna sem hýsti hið alræmda Alcatraz fangelsi. Því miður fengum við ekki tækifæri á að skoða það þar sem maður þarf að panta miða nokkrum vikum áður og við skipulögðum ferðina okkar nokkrum dögum áður en við héldum af stað.

Pier 39.

Sú gamla var alltaf með morgunverð handa okkur.

Vancouver, Kanada

Skólinn bauð okkur stelpunum í prógramminu í helgarferð til Vancouver. Við Anne frá Þýskalandi og Natalia frá Þýskalandi/Úkraínu fórum ásamt Mark sem er yfir skiptiprógramminu í road trip yfir til Kanada. Við gistum á campus University of British Columbia og vorum í raun bara í borgarferð, skoðuðum nokkur hverfi borgarinnar, fórum í dinner og brunch og svo kíktum við stelpurnar út á lífið sem er ansi fjörugt í borginni þar sem ein löng gata hýsir flesta pöbba og klúbba borgarinnar, afar hentugt. Við skoðuðum einnig Indjánasafn en það fannst okkur áhugavert þar sem tvær okkar vorum í kúrsum sem fjölluðu um sögu Indjánanna norð-vestur Norður-Ameríku heimsálfunnar. 

Campusinn var mjög fallegur með útsýni yfir sjóinn og fjöllin.

Los Pollos Hermanos.. aðdáendur Breaking Bad ættu að þekkja þetta.